Dêrom, en nei oanlieding fan it koalysjeakkoart en it kolleezjeprogram, hat de FNP fraksje op ‘e nij sjoen nei it ferâldere Frysk Taalbelied en hat de FNP in aktualisearre ferzje opsteld. De ried fan Skarsterlân wurdt foarsteld dizze aktualisearre ferzje Frysk Taalbelied fêst te stellen. Fierder wurdt it kolleezje de opdracht meijûn om dizze aktualisearre ferzje plus in twa-jierlikse evaluaasje fan it taalbelied yn de harmonisaasje yn te bringen. De aktualisaasje fan it Fryske Taalbelied wie al opnommen yn sawol it koalysjeakkoart “Romte foar Skarsterlân” as yn it kolleezjeprogram 2010-2014.
Sa as bekend stean ús 3 gemeenten (Skarsterlân mei Gaasterlân-Sleat en Lemsterlân) foar in harmonisaasjetrajekt. Yn dit harmonisaasjetrajekt wurdt it belied fan de 3 gemeenten op ferskaat mêd ta ien belied makke. Dat jildt dus ek foar it Frysk Taalbelied. It is dan wol fan belang dat datjinge wat wy as gemeente Skarsterlân ynbringe ek sa aktueel mooglik formulearre is.
Neffens griffier Beent Keulen fan de gemeente Skarsterlân komt it mar selden foar dat in fraksje sels mei in riedsútstel komt. It riedsútstel stiet op 'e aginda foar de kommisje Mienskipssaken fan woansdei 11 april.
Sjoch ek: 'It Fryske Taalbelied yn Skarsterlân' (12 april 2011)
Frysk 
Nederlands
