NIJS 27-12-2006
FNP: Alle skoallen kinne flot in gemeentelike bydrage krije foar de nije Fryske lesmethoade!
Oanpassing subsydzje makket flotte oanskaf fan nije Fryske lesmetoade foar alle skoallen mooglik.
De Gemeente hat mei yngong fan 2006 jierliks € 3.500,- begrutte om de basisskoallen finansjeel te helpen by de oanskaf fan de nije Studio-F lesmetoade.
De FNP fynt it fan grut belang dat alle basisskoallen yn Skarsterlân sa
gau mooglik mei dizze nije lesmetoade begjinne. It stribjen moat wêze
dat úterlik septimber 2008 alle skoallen foar de groepen 4 oant en mei
8 mei dizze metoade wurkje. De earste skoallen binne septimber 2006 al
mei dizze metoade útein set foar de groepen 4, 5 en 7.
De kosten
De kosten fan earste oanskaf fan Studio-F komme foar groep 4 op € 30,-
de learling en foar de hegere groepen op € 35,- de learling. Dat
materiaal moat 5 jier meikinne. Foar oanfoljende boekjes komt der noch
4 jier € 5,- de learling by. De folsleine kosten foar de nije metoade
foar dy 1700 learlingen fan groep 4 oant te mei 8, komt dan foar 5 jier
rûchwei op € 85.000,-. Dat is € 17.000,- yn 't jier.De gemeentlike
subsydzje-regeling giet út fan in bydrage fan in fjirde part fan de
kosten. Dat soe dan € 4.250 yn 't jier wurde, wylst it subsydzjebedrach
€ 3.500 is. Dêr moat dus € 750,- yn 't jier by. Boppedat as de skoallen
hast allegear de earste pear jier al in oanfraach dogge, dan moatte
takomstige jierlikse bydragen dus earder oansprutsen wurde. Omdat
mooglik te meitsjen hat de FNP desimber 2006 de folgjende moasje oan de
gemeenteried foarsteld:
It moat befoardere wurde dat de basisskoallen yn Skarsterlân sa gau
mooglik de nije lesmetoade Studio-F foar Fryske taalles oanskaffe en
brûke sille. It jierlikse bedrach fan de gemeentlike subsydzje-regeling
mei gjin behindering wêze. Wy wolle dêrom oan it kolleezje foarstelle,
as de oanfragen dat needsaaklik meitsje om:
1. it subsydzje-budzjet fan takomstige jierren nei foaren te heljen.
2. it jierlikse budzjet sadanich te ferheegjen, dat oan alle oanfragen foldien wurde kin.
Alle partijen koene it hjir mei iens wêze en B&W sille de regeling
oanpasse. De skoallen kinne dus mar los. Finansjeel is it gjin probleem
mear, omdat de Provinsje ek in bydrage jout en omdat de skoallen fan it
Ryk al in jierlikse bydrage krije foar de Fryske les.
Wêrom flotte oanpak?
Fraksjefoarsitter Ronny de Vries sei yn de taljochting dat de
skoallen yn Skarsterlân it Frysk hiel ferskillend oanpakke, fan goed
oant min. Dat is gjin goede saak. Dêrom is hy bliid mei de nije
metoade. It is fan grut belang dat alle skoallen dêr no sa gau mooglik
en goed mei begjinne.
De PC-skoallen yn Skarsterlân sille der allegear binnen 2 jier mei los.
Dat moat ek it doel fan de iepenbiere skoallen wêze, sei De Vries.
Goede Fryske les sil it taalgevoel fan de bern befoarderje. In
bytsje omgrieme mei it Frysk helpt wat dat oangiet net. As de Fryske
les goed jûn wurdt, is dat dus net skealik foar it Nederlânsk,mar
earder posityf. Boppedat kin it in tige goede opstap wêze nei 3-talich
ûnderwiis mei Ingelsk der by yn de lêste groepen.
It is net om 'e nocht dat de 2 proefskoallen yn Skarsterlân
foar studio-F, no ek ús earste 3-talige skoallen wurde (Terkaple en
Haskerfjild).
As wy it Frysk behâlde wolle, sille de bern it leare moatte. Lokkich
wurdt der stadichoan troch de minsken positiver oer tocht. It is ek
tige weardefol om yn de tiid fan globalisearing tagelyk wiis te wêzen
mei eigen identiteit.
De Vries wie dêrom bliid mei de algemiene stipe yn de
gemeenteried. It Frysk is fan ús allegear en meiinoar binne wy der
ferantwurdlik foar. Hooplik sil dizze positive stap fan de gemeenteried
al ús skoallen stimulearje om it goed oan te pakken.
Tags:
Algemien
MEAR OER DIT ÛNDERWERP
Frysk 
Nederlands
